28 نوفمبر 2007

 

الجغرافيا الطبية (بهاء جاهين)


بسيطة!
أمسح شجاك من ع الخريطة
بصاروخ موجه للقلوب العبيطة

بسيطة جدا!
كل الأماني علي امتداد البسيطة
أورام..
دواها صاروخ ذكي
مظبوط علي الأوجاع بتظبيطة
وإذا ابتدينا نقول
الكلمة ننطقها تزول علي طول..
مدن حزينة باسمها..

مش قلت لك حزنك بدائي جهول
ومالوش دوا
إلا بسر التكنولوجيا الغويطة
إلا بزر التكنولوجيا المهول؟

بمسح ذري للخلايا النشيطة
سرطانك المجرم خلاص مش غول
قطة أليفة.. قطيطة
تلحس في جير الحيطة
وترتعش في فروها المبلول

*****

نزل المطر كل نقطة مصوبة بإلهام
نام في سلام
وسيب علينا الانتقام
نشفيك من الجرب اللي صاب النهر
نشفيك من الغل اللي في الآكام..
كبر الجبال الأليطة..
وهمهمات اليمام

إديني أول حرف من أي إسم
أفني اللغات وكُتبها، حتي الكلام
عيّان يا عيني بكافة الأوهام..
بتاريخ من الفروسية والإجرام
أشعار صعاليك الآداب اللقيطة

بدال ما تدخل معهد الأورام
أدخل معانا ف حلف
واحلف: برئت من النخيل والحمام
من الرغيف والسميطة
والدقة والأحلام
من الربابة وملحمات زمبليطة
ودخلت في حلف الوئام التام
مخلوق وديع ع الدوام
وخُد دواك بانتظام
كوبالت يمسح البلاد المحيطة
وح ييجي دورك تتمسح
وتنام

*****

مش قلت لك دية عذابك بسيطة


____________________
© 2004 بهاء جاهين - من ديوان "الارتفاع المسموح متر"
القصيدة منشورة بتصريح من الشاعر.

التسميات: ,


تعليقات (0):

إرسال تعليق

أول الشارع >>