05 فبراير 2006

 

أكذوبة الفعل المضارع (أمين حدّاد)

(قصيدة لم تنشر من قبل للشاعر أمين حداد)

جرب ابتسامتك في الضلمه
اشرب الخمور الفواره
ارضع من حنينك أغنيه
من كل البيوت اللي بتسهر
شباك الجيران اللي موارب
هو اللي اشتبك مع نظراتك
حاول تفتكر أيها مطلع
مش حتلاقي أجمل من كلمة
الفعل المضارع أكذوبه

اطمن على الطفل النايم
روح الشغل وانت بتتاوب
خد نفق العروبه .. صلاح سالم
اضحك من غباوة أيامك
الفعل المضارع أكذوبة

لو جدك بيشرح للطلبة
فى مدرج اتملا بالطرابيش
ليه والدك عجوز بالجلابية
بيصور ورق في ميدان لبنان
الفعل المضارع أكذوبة

في كل الساعات الرقمية
وفي كل اللي موانيها عقارب
الماضي الشره عمال يبلع
مستقبل حياتك وما يشبعش
بيطبطب على كرشه وعارف
حتمية سقوط التفاحة
الفعل المضارع أكذوبة

مش بكره أكيد كان بيشقشق
واختار ينسحب يبقى امبارح
مش الشعر ده كان جوه كتاب
ليه فتحته واتخضيت منه
أنا ميت قديم في تراب أقدم
والفعل المضارع أكذوبه

____________________
© 2004 أمين حداد
القصيدة منشورة بتصريح من الشاعر.

التسميات: ,


تعليقات (4):

  Blogger عشقك ندي قال/قالت:

جميلة جدا ورائعة معبرة فعلا اللحظة الحالية اكذوبة فهي تتواري سريعا لتصبح ماضي الله
شكرا ليك

6/2/06 02:34
 
  Blogger Geronimo قال/قالت:

حلوة جدا يا عمرو وسمعتك وانت بتلقيها وبتأمن على حروفها اختيار جيد

16/2/06 03:58
 
  Blogger عمرو قال/قالت:

أشكرك يا جيرنيمو :)

عشقك ندي: سعيد إنها عجبتك.

منورين الشارع الأدبي :)

16/2/06 14:14
 
  Anonymous غير معرف قال/قالت:

أمين حداد الغالى أبن الغالى
ماتعرفش إزاى بيقدر يعدى خيوط بصره فى الأشياء فايشوف اللى ما يتشافش.كل بيت تجربه ف حد ذاتها من غير أى قوالب و لا قيود على الأبداع
ربنا يخليك لينا و يرحم العظيم الطيب والداك

2/8/06 20:48
 

إرسال تعليق

أول الشارع >>